راہل گاندھی نے کہا کہ یہ افسوسناک ہے کہ ہمیں آج پارلیمنٹ میں نیٹ کے موضوع پر بولنے کی اجازت نہیں دی گئی، یہ ایک سنگین فکر کا موضوع ہے جو پورے ہندوستان میں لاکھوں کنبوں کو پریشان کر رہا ہے۔
قومی اواز (کروالی نیوز بیرو ) 29-06-2024
نیٹ پیپر لیک معاملے پر پارلیمنٹ میں مباحثہ نہیں ہونے پر حزب اختلاف کے لیڈر راہل گاندھی نے کہا کہ نیٹ کے معاملے میں بہت بڑی آفت آئی ہے۔ سب کو پتہ ہے کہ پیپر لیک ہوا۔ لوگوں نے ہزاروں کروڑ روپے کمائے اور طلبا کا نقصان ہوا۔ میڈیکل کے شعبہ میں جانے کا ان کا خواب چکناچور ہو گیا اور ان کا مذاق اڑایا گیا۔ کل میں نے حزب اختلاف کی میٹنگ میں خود اس موضوع کو اٹھایا اور اس پر ایک دن کی بحث سے متعلق تجویز رکھی۔ حزب اختلاف کی سبھی پارٹیوں نے یک زبان ہو کر اس پر اتفاق ظاہر کیا۔ میں نے پارلیمنٹ میں اس موضوع کو اٹھایا لیکن مجھے بولنے نہیں دیا گیا۔ یہ افسوسناک ہے کہ حکومت اس پر بحث نہیں چاہتی۔ مجھے ایسا لگا کہ ہدایت براہ راست وزیر اعظم سے ملی تھی۔ یہ افسوسناک ہے کہ وزیر اعظم کو بحث کی قیادت کرنی چاہیے تھی لیکن وہ بحث ہی نہیں چاہتے ہیں۔
