قومی اواز ( کراولی نیوز بیرو ) 11 جولائی 2024 اترپردیش میں بجلی صارفین کو بجلی کا کرنٹ لگنے والا ہے، اگر یہ تجویز منظور کر لی جاتی ہے تو صنعتوں اور غریبوں کو نئے کنکشن پر زیادہ قیمت ادا کرنی پڑ سکتی ہے۔
اتر پردیش پاور کارپوریشن کی جانب سے نئے بجلی کنکشن کی شرحوں کے لیے ریگولیٹری کمیشن میں نظرثانی شدہ کاسٹ ڈیٹا بک کی تجویز داخل کی گئی ہے۔ اس کے تحت اب غریب دیہاتیوں کو بھی نیا کنکشن لینے کے لیے 44 فیصد زیادہ ادا کرنا پڑے گا۔ اسی طرح صنعتوں کے نرخوں میں 50 سے 100 فیصد تک اضافے کی تجویز ہے۔
اگر یوگی حکومت یہ تجویز منظور کر تی ہے تو اس سے غریب صارفین زیادہ متاثر ہو سکتے ہیں۔ پاور کارپوریشن نے 2 کلو واٹ تک کنکشن کے لیے لیبر آئٹم کی رقم 150 روپے سے بڑھا کر 564 روپے کر دی ہے۔ جس کی وجہ سے بی پی ایل اور چھوٹے گھریلو کنکشن لینے والوں کو 44 فیصد تک زیادہ ادائیگی کرنی ہوگی۔
نیو ز پورٹل ’اے بی پی‘ پر شائع خبر کے مطابق موجودہ صورتحال کے بارے میں بات کریں تو 1 کلو واٹ کنکشن پر 1032 روپے جی ایس ٹی کے بغیر وصول کیے گئے تھے۔ اب یہ ریٹ مجوزہ قیمت میں 1486 روپے ہو گیا ہے۔ جبکہ اسمارٹ میٹر کے سنگل فیز کنکشن پر 3822 روپے دیئے جا رہے تھے جو اب بڑھ کر 6316 روپے ہو سکتے ہیں۔
