تہران: ایران کے سپریم لیڈر آیت اللہ علی خامنہ ای ہفتہ، 28 فروری 2026 کی صبح امریکہ اور اسرائیل کی مشترکہ فضائی کارروائی میں ہلاک ہوگئے ہیں۔ ایرانی سرکاری میڈیا نے اس خبر کی تصدیق کرتے ہوئے بتایا کہ 86 سالہ خامنہ ای اپنے سرکاری دفتر، بیتِ رہبری کمپلیکس، میں موجود تھے جب یہ حملہ کیا گیا۔
ایران کی سپریم نیشنل سیکیورٹی کونسل کی جانب سے جاری بیان کے مطابق فضائی حملہ انتہائی حساس مقام کو نشانہ بنا کر کیا گیا، جس کے نتیجے میں سپریم لیڈر موقع پر ہی جاں بحق ہوگئے۔ رپورٹس کے مطابق اس حملے میں ان کے خاندان کے چند افراد، جن میں بہو اور بیٹی سمیت دیگر قریبی رشتہ دار بھی شامل تھے، ہلاک ہوئے ہیں۔
آیت اللہ علی خامنہ ای سنہ 1989 سے مسلسل 37 برس تک ایران کے سپریم لیڈر کے عہدے پر فائز رہے۔ وہ ایران کے اسلامی انقلاب کے بانی آیت اللہ روح اللہ خمینی کے بعد اس منصب پر آئے تھے۔ اپنے طویل دورِ اقتدار کے دوران وہ امریکہ اور اسرائیل مخالف پالیسیوں، مشرقِ وسطیٰ میں ایران کے اثر و رسوخ کو بڑھانے اور ملک کے اندر ہونے والے احتجاجی مظاہروں کے خلاف سخت اقدامات کے باعث عالمی سطح پر نمایاں شخصیت رہے۔
امریکہ کے صدر ڈونلڈ ٹرمپ نے سوشل میڈیا پلیٹ فارم “ٹروتھ سوشل” پر ایک بیان جاری کرتے ہوئے خامنہ ای کی ہلاکت کی تصدیق کی اور کہا کہ ایران کے خلاف فوجی کارروائیاں جاری رہیں گی۔ اس بیان کے بعد خطے میں کشیدگی مزید بڑھنے کے خدشات ظاہر کیے جا رہے ہیں۔
ایرانی حکومت نے ملک بھر میں 40 روزہ سرکاری سوگ کا اعلان کیا ہے۔ سرکاری عمارتوں پر پرچم سرنگوں کر دیے گئے ہیں جبکہ سیکیورٹی اداروں کو ہائی الرٹ پر رکھا گیا ہے۔
سیاسی تجزیہ کاروں کے مطابق خامنہ ای کی موت ایران کی سیاسی قیادت کے لیے ایک بڑا دھچکا ثابت ہوسکتی ہے، کیونکہ اب تک ان کے جانشین کے حوالے سے کوئی واضح اعلان سامنے نہیں آیا۔ اس صورتحال نے ایران کے سیاسی مستقبل اور خطے کے توازنِ طاقت کے بارے میں کئی سوالات کھڑے کر دیے ہیں۔
کراولی نیوز نیٹ ورک بھٹکل
