سوشیل ڈیموکریٹک پارٹی آف انڈیا (ایس ڈی پی آئی) نے بھٹکل میں پیش آئے حالیہ واقعہ کی سخت مذمت کرتے ہوئے کہا ہے کہ بھٹکل میں موجود کھلے مورین کٹے پر بغیر کسی اجازت کے بعض شرپسند عناصر کی جانب سے تعمیراتی کام شروع کرنے کی کوشش ہی ناخوشگوار حالات پیدا ہونے کی اصل وجہ بنی۔
پارٹی کے ضلع صدر ریاض سرسی نے اپنے بیان میں کہا کہ بھٹکل ایک نہایت حساس علاقہ ہے، اس لیے ضلعی انتظامیہ اور پولیس محکمہ کو پہلے ہی سخت احتیاطی اقدامات کرنے چاہیے تھے۔ حالات کی مکمل جانکاری ہونے کے باوجود اس واقعہ کو روکنے میں ناکامی انتظامیہ کی واضح غفلت کو ظاہر کرتی ہے۔
بیان میں مزید کہا گیا کہ بعض سنگھ پریوار سے وابستہ لیڈران اور کارکنان سماج میں نفرت، اشتعال اور عدم برداشت کو فروغ دینے والی اشتعال انگیز تقاریر کر رہے ہیں، جو انتہائی تشویشناک امر ہے۔ ایسے عناصر کے خلاف سخت قانونی کارروائی کی جانی چاہیے جو سماجی ہم آہنگی اور امن و امان کو خراب کرنے کی کوشش کر رہے ہیں۔
ایس ڈی پی آئی نے زور دے کر کہا کہ امن، بھائی چارہ اور قانون و انتظام کو برقرار رکھنا پولیس محکمہ کی بنیادی ذمہ داری ہے، اس لیے نفرت انگیز بیانات دینے والوں کے خلاف فوری اور سخت قانونی کارروائی عمل میں لائی جائے۔
پارٹی نے بھٹکل کے تمام طبقات کے عوام سے اپیل کی ہے کہ وہ صبر، امن، بھائی چارگی اور رواداری کو برقرار رکھتے ہوئے کسی بھی اشتعال انگیزی کا شکار نہ ہوں اور سماجی ہم آہنگی کو قائم رکھیں۔
ریاض سرسی
ضلع صدر
سوشیل ڈیموکریٹک پارٹی آف انڈیا (ایس ڈی پی آئی)
اترکنڑا ضلع
