راس لیلا ( ناجائز تعلق) ویڈیو وائرل: رام چندر راؤ معطل
بنگلورو: راس لیلا ( ناجائز تعلق) ویڈیو وائرل ہونے کے فوراً بعد ریاستی حکومت نے شہری حقوق نفاذ ڈائریکٹوریٹ کے ڈی جی پی ڈاکٹر کے۔ رام چندر راؤ کو فوری طور پر معطل کر دیا ہے۔
پیر کی دوپہر یہ ویڈیوز سوشل میڈیا پر تیزی سے پھیلیں، جن میں مبینہ طور پر افسر اپنے ہی دفتر میں خواتین کے ساتھ غیر مہذب اور نامناسب رویہ اختیار کرتے ہوئے نظر آ رہے ہیں۔ اس واقعے سے حکومت کو شدید شرمندگی کا سامنا کرنا پڑا ہے اور حکم نامے میں اسے آل انڈیا سروس (ضابطۂ اخلاق) کے قوانین کی خلاف ورزی قرار دیا گیا ہے۔
وزیر اعلیٰ سدارامیا نے کہا کہ “کوئی بھی قانون سے بالاتر نہیں ہے” اور سخت کارروائی کی ہدایت دی تھی۔ پہلے انہیں 10 دن کی لازمی رخصت پر بھیجا گیا تھا، لیکن راتوں رات اچانک معطلی کا حکم جاری کر دیا گیا۔ محکمانہ انکوائری کا حکم دیا گیا ہے اور تفتیش جاری ہے۔
رام چندر راؤ نے الزامات کو مسترد کرتے ہوئے کہا ہے کہ ویڈیو جعلی طور پر ایڈٹ کی گئی ہے یا پھر اے آئی سے تیار کی گئی ہے۔ ان کی ریٹائرمنٹ میں صرف 4 مہینے باقی تھے جب یہ واقعہ پیش آیا۔ وہ اداکارہ رنیا راؤ کے والد (منہ بولے والد) ہیں اور اس سے پہلے سونے کی اسمگلنگ کے معاملے میں بھی زیر بحث رہ چکے ہیں۔
رپورٹ : کراولی نیوز نیٹ ورک بھٹکل
