بھٹکل میں یومِ صحافت کی تقریب، نمایاں خدمات انجام دینے والے پولیس اہلکاروں کی تہنیت
بھٹکل: یومِ صحافت کے موقع پر کرناٹک ورکنگ جرنلسٹس وائس (دھونی) کی بھٹکل تعلقہ یونٹ کے زیرِ اہتمام اتوار کو بھٹکل ٹاؤن پولیس اسٹیشن میں ایک باوقار تقریب منعقد ہوئی، جس میں پولیس محکمہ اور ذرائع ابلاغ کے درمیان باہمی اعتماد، تعاون اور سماجی ذمہ داری کی اہمیت کو اجاگر کیا گیا۔
تقریب کی صدارت بھٹکل سب ڈویژن کے ڈی وائی ایس پی بی۔ گریش نے کی، جبکہ بھٹکل ٹاؤن سرکل کے سی پی آئی دیواکر مہمانِ خصوصی کی حیثیت سے شریک ہوئے۔
اس موقع پر ریاستی سطح پر نمایاں خدمات انجام دینے والے بھٹکل ٹاؤن پولیس اسٹیشن کے پی ایس آئی نوین نائک کو وزیراعلیٰ میڈل کے لیے منتخب ہونے پر اور ہیڈ کانسٹیبل دیپک نائک کو ڈی جی–آئی جی پی اعزازی تمغہ حاصل ہونے پر کرناٹک ورکنگ جرنلسٹس وائس (دھونی) بھٹکل تعلقہ یونٹ کی جانب سے تہنیت پیش کرتے ہوئے شال پوشی اور گلپوشی کے ذریعے اعزاز سے نوازا گیا۔ اس موقع پر کرناٹک ورکنگ جرنلسٹ بھٹکل تعلقہ کے صدر جناب نسیم الغنی شاہ ہبندری نے دونوں اہلکاروں کو اعزاز پیش کیا۔
تقریب کے دوران کرناٹک ریاستی اخباری تقسیم کاروں کی انجمن کے صدر سبرامنیم بھٹ سمیت منجوناتھ موگیر، دیانند نائک، گنیش نائک اور یششری آر۔ بھٹ کو بھی ان کی خدمات کے اعتراف میں اعزاز سے نوازا گیا۔
اپنے صدارتی خطاب میں ڈی وائی ایس پی بی۔ گریش نے کہا کہ معاشرے کے مفاد میں پولیس اور صحافیوں کے درمیان مضبوط اور مثبت تعلقات ناگزیر ہیں۔ انہوں نے کہا کہ صحافی عوام کی آواز بن کر انتظامی خامیوں کو اجاگر کرتے ہیں، جبکہ پولیس اہلکار عوام کے تحفظ اور امن و امان کے قیام میں اہم کردار ادا کرتے ہیں۔ انہوں نے کہا کہ اس نوعیت کی تقریبات دونوں اداروں کے درمیان اعتماد اور باہمی احترام کو مزید مستحکم کرتی ہیں۔
سی پی آئی دیواکر نے اپنے خطاب میں صحافتی خدمات کو سراہتے ہوئے کہا کہ پولیس اور میڈیا کو معاشرے کی بھلائی کے لیے ذمہ داری اور دیانت داری کے ساتھ مل کر کام کرنا چاہیے۔
اعزاز یافتہ پی ایس آئی نوین نائک اور ہیڈ کانسٹیبل دیپک نائک نے ان کی خدمات کو سراہنے پر کرناٹک ورکنگ جرنلسٹس وائس (دھونی) کا شکریہ ادا کرتے ہوئے کہا کہ یہ اعزاز انہیں مزید بہتر انداز میں عوامی خدمت انجام دینے کی ترغیب دے گا۔
تقریب کے آغاز میں تنظیم کے خزانچی ارجن ملیا نے مہمانوں کا استقبال کیا، جبکہ ساحلی کرناٹک زون کے صدر کمار نائک نے استقبالیہ کلمات پیش کرتے ہوئے یومِ صحافت کی اہمیت اور تنظیم کی سرگرمیوں پر روشنی ڈالی۔
تقریب کی قیادت کرناٹک ورکنگ جرنلسٹس وائس (دھونی) بھٹکل تعلقہ یونٹ کے صدر نسیم الغنی شاہ ہبندری نے کی۔ اس موقع پر کرناٹک ورکنگ جرنلسٹس وائس بھٹکل تعلقہ کے سیکریٹری اُلاس شانبھاگ، اراکین محمد اشرف، گروپرساد، دیگر عہدیداران، صحافی، پولیس افسران اور اہلکار بڑی تعداد میں موجود تھے۔
تقریب کے اختتام پر صحافیوں اور پولیس محکمہ کے درمیان باہمی تعاون، احترام اور سماجی ذمہ داری کو مزید فروغ دینے کے عزم کا اظہار کیا گیا۔
رپورٹ: کراولی نیوز نیٹ ورک، بھٹکل
