بھٹکل: عید سوہاردا (ہم آہنگی) اجلاس میں ترقیاتی مسائل پر غور، وزیر کی عدم شرکت پر ناراضگی
بھٹکل میں مجلسِ اصلاح و تنظیم کے زیر اہتمام منگل کی شب آمینہ پیلس میں عید سوہاردا (ہم آہنگی) اجلاس منعقد ہوا، جس میں شہر کی ترقی، سماجی نظم و ضبط اور عوام و انتظامیہ کے درمیان تعاون جیسے اہم امور پر تفصیلی تبادلۂ خیال کیا گیا۔
اجلاس کی صدارت تنظیم کے صدر عنایت اللہ شاہ بندری نے کی۔ اپنے خطاب میں انہوں نے شہر کے بنیادی ڈھانچے سے متعلق مسائل کو اجاگر کرتے ہوئے قومی شاہراہ کی تعمیر میں تاخیر، رنگین کٹّے اور دیگر علاقوں میں نکاسیٔ آب کے ناقص نظام، اور بارش کے دوران پانی جمع ہونے کے خدشات پر تشویش ظاہر کی۔ انہوں نے 110 کے وی بجلی سب اسٹیشن کی تاخیر اور تہواروں کے دوران بجلی کی غیر یقینی فراہمی پر بھی ہیسکام سے توجہ دینے کی اپیل کی۔
ہیسکام کے چیئرمین سید عظیم پیر قادری نے اپنے خطاب میں مسلمانوں کو دینی تعلیم کے ساتھ جدید تعلیم حاصل کرنے پر زور دیا تاکہ وہ قومی دھارے میں مؤثر کردار ادا کر سکیں۔ انہوں نے نوجوانوں سے اپیل کی کہ وہ اپنی صلاحیتوں کو ملک کی ترقی کے لیے استعمال کریں۔
ضلع کلکٹر کے۔ لکشمی پریا نے یقین دہانی کرائی کہ بارش سے قبل نکاسیٔ آب کے کام مکمل کرنے کے لیے متعلقہ افسران کو ہدایات جاری کی جا چکی ہیں۔ انہوں نے شہر میں پھیل رہے خسرہ (میزلز) کے مرض پر تشویش ظاہر کرتے ہوئے عوام سے ویکسین لینے کی اپیل کی۔
ضلع پولیس سپرنٹنڈنٹ دیپن ایم این نے سڑک حادثات کی روک تھام کے لیے ہیلمٹ کے استعمال کو لازمی قرار دینے پر زور دیا اور نوجوانوں میں بڑھتے منشیات کے رجحان کو روکنے کے لیے کونسلنگ پروگراموں کی اہمیت بیان کی۔
ضلع پنچایت کے چیف ایگزیکٹو آفیسر دلیش ساسی نے کہا کہ سرکاری اسکیموں کو مؤثر طریقے سے عوام تک پہنچانے کے لیے کمیونٹی کی شمولیت ضروری ہے۔ انہوں نے صحت اور تعلیم سے متعلق غلط فہمیوں کو دور کرنے میں سماجی تنظیموں سے تعاون کی اپیل کی۔
پروگرام کا آغاز مولانا عزیز الرحمن ندوی کی تلاوتِ قرآن پاک سے ہوا۔ عبدالرقیب ایم جے نے استقبالیہ پیش کیا جبکہ سینئر صحافی ایم آر مانوی نے نظامت کے فرائض انجام دیے۔ اس موقع پر یوگیش، راما موگیر، انڈین نوائط فورم کے صدر آفتاب کولا، الطاف کھروری سمیت کئی معزز شخصیات موجود تھیں۔
وزیر کی عدم شرکت پر ناراضگی
اجلاس میں ریاستی وزیر منکال ایس ویدیا کی غیر حاضری پر مقامی مسلم قائدین نے ناراضگی کا اظہار کیا۔ منتظمین کے مطابق پروگرام کی تاریخ وزیر کی سہولت کو مدنظر رکھتے ہوئے طے کی گئی تھی، تاہم اس کے باوجود ان کی شرکت نہ کرنا افسوسناک قرار دیا گیا۔
کچھ قائدین نے اس بات پر بھی تشویش ظاہر کی کہ عوامی نمائندے دیگر برادریوں کے پروگراموں میں تو سرگرمی سے شریک ہوتے ہیں، لیکن مسلم کمیونٹی کے اہم مواقع پر یکساں توجہ نہیں دیتے۔ اس صورتحال نے برابری اور سماجی ہم آہنگی سے متعلق کئی سوالات کو جنم دیا ہے، اور مقامی سیاسی حلقوں میں اس کے ممکنہ اثرات پر نظر رکھی جا رہی ہے۔
رپورٹ: کراولی نیوز نیٹ ورک، بھٹکل
