بھٹکل مورین کٹے کی از سرِ نو تعمیر کو ہری جھنڈی، اصل مقام پر ہی دوبارہ قائم کیا جائے گا
بھٹکل: گزشتہ چند ماہ سے زیرِ بحث رہنے والے مورین کٹے معاملے کے حل کی راہ ہموار ہوگئی ہے۔ ضلع انتظامیہ نے مورین کٹے کو اس کے اصل مقام پر دوبارہ تعمیر کرنے کا فیصلہ کیا ہے اور اس سلسلے میں ضروری کارروائی جلد شروع کی جائے گی۔ یہ بات اتر کنڑا کے رکنِ پارلیمان وشویشور ہیگڑے کاگیری نے منگل کو میڈیا سے گفتگو کرتے ہوئے کہی۔
انہوں نے بتایا کہ اس معاملے پر ضلع انتظامیہ، عوامی نمائندوں اور مختلف تنظیموں کے ساتھ متعدد مراحل میں مشاورت کی گئی۔ تمام پہلوؤں کا جائزہ لینے کے بعد قومی شاہراہ کے ڈیوائیڈر پر موجود اصل مورین کٹے کو اسی مقام پر دوبارہ تعمیر کرنے پر اتفاق رائے قائم ہوا ہے۔
واضح رہے کہ قومی شاہراہ کی توسیعی منصوبے کے دوران مورین کٹے کو وہاں سے منتقل کرکے شاہراہ کے کنارے نئی جگہ پر تعمیر کیا گیا تھا۔ بعد ازاں اس تعمیر کو بعض افراد نے منہدم کر دیا تھا، جس کے نتیجے میں علاقے میں کشیدگی اور قانون و نظم سے متعلق چند ناخوشگوار واقعات بھی پیش آئے تھے۔
اس واقعے کے خلاف مختلف ہندو تنظیموں اور بی جے پی رہنماؤں نے احتجاج کرتے ہوئے مورین کٹے کی دوبارہ تعمیر کا مطالبہ کیا تھا۔ احتجاج کے دوران بعض مقدمات بھی درج ہوئے، تاہم بعد میں مسئلے کے پُرامن اور قانونی حل کے لیے مسلسل کوششیں جاری رہیں۔
کئی اجلاسوں اور مشاورتی نشستوں کے بعد بالآخر مورین کٹے کو اس کے اصل مقام پر دوبارہ تعمیر کرنے کا متفقہ فیصلہ کیا گیا ہے۔ رکنِ پارلیمان نے کہا کہ معاملے کو خوش اسلوبی سے حل کرنے کے لیے متعلقہ حکام کو ضروری ہدایات جاری کر دی گئی ہیں اور آئندہ تمام اقدامات انتظامی طریقۂ کار کے مطابق انجام دیے جائیں گے۔
انہوں نے عوام سے امن، بھائی چارے اور باہمی تعاون کو برقرار رکھنے کی اپیل بھی کی۔
اس موقع پر سابق رکنِ اسمبلی سنیل نائک سمیت بی جے پی کے متعدد مقامی رہنما موجود تھے۔
رپورٹ : کراولی نیوز نیٹ ورک بھٹکل
