کنداپور: کرناٹک ورکنگ جرنلسٹس وائس (دھونی) اُڈپی ضلع اور امبیڈکر سینا کے زیرِ اہتمام یومِ صحافت اور اعزازی تقریب کا کامیاب انعقاد
کنداپور، 4 جولائی: کرناٹک ورکنگ جرنلسٹس وائس (رجسٹرڈ) ضلع اُڈپی اور امبیڈکر سینا کے مشترکہ زیرِ اہتمام ہفتہ کی صبح تِراسی کے پریسٹیج پیلس میں یومِ صحافت اور اعزازی تقریب شاندار انداز میں منعقد ہوئی۔
تقریب کی صدارت کنداپور کے سینئر وکیل روی کرن مُرڈیشور نے کی۔ اپنے صدارتی خطاب میں انہوں نے کہا کہ صحافت جمہوریت کا چوتھا ستون ہے، جو مقننہ، عدلیہ اور انتظامیہ کو درست سمت میں لے جانے میں اہم کردار ادا کرتی ہے۔ انہوں نے حکومت سے مطالبہ کیا کہ صحافیوں کے تحفظ کے لیے مؤثر قانون نافذ کیا جائے تاکہ وہ بے خوف ہو کر اپنی ذمہ داریاں انجام دے سکیں۔
تقریب کا افتتاح کرناٹک ورکنگ جرنلسٹس وائس کے ریاستی صدر بنگلے ملیکارجن نے شمع روشن کرکے کیا۔ انہوں نے اپنے خطاب میں کہا کہ معاشرے میں ہونے والی ناانصافیوں، عدم مساوات اور بدعنوانیوں کو عوام کے سامنے لانا صحافیوں کی بنیادی ذمہ داری ہے۔ انہوں نے زور دیا کہ میڈیا کو جمہوریت کے چوتھے ستون کی حیثیت سے عوام تک درست، مستند اور قابلِ اعتماد معلومات پہنچانے کا فرض پوری دیانت داری سے ادا کرنا چاہیے۔
انہوں نے کہا کہ خبریں جمع کرنے اور نشر کرنے کے دوران کئی صحافی اپنی جان کی پروا کیے بغیر خدمات انجام دیتے ہیں، اس لیے حکومت کو ان کی فلاح و بہبود اور ان کے اہلِ خانہ کے تحفظ کے لیے مزید مؤثر اقدامات کرنے چاہییں۔ انہوں نے یقین دلایا کہ تنظیم آئینِ ہند کی جانب سے عطا کردہ آزادیٔ اظہار کے دائرے میں سماجی انصاف کے لیے کام کرنے والے صحافیوں کے ساتھ ہمیشہ کھڑی رہے گی۔
تقریب کے مہمانِ خصوصی امبیڈکر سینا کے ریاستی صدر ڈاکٹر پی مورتی نے اپنے خطاب میں کہا کہ سچائی، دیانت داری اور ذمہ داری پر مبنی صحافت ہی معاشرے کو صحیح سمت دکھا سکتی ہے۔ انہوں نے خبردار کیا کہ حقائق سے ہٹ کر پیش کی جانے والی خبریں معاشرے پر منفی اثرات مرتب کر سکتی ہیں۔
اس موقع پر 300 سے زائد غیر منظم شعبے کے مزدوروں کی مفت رجسٹریشن کی گئی اور انہیں محکمۂ محنت کے شناختی کارڈ بھی تقسیم کیے گئے۔
تقریب کے دوران ریٹائرڈ بھارتی فوجیوں، سینئر صحافیوں، سماجی خدمت انجام دینے والی شخصیات، طلبہ اور مختلف شعبۂ ہائے زندگی میں نمایاں خدمات انجام دینے والے افراد کو تہنیت و اعزاز سے نوازا گیا۔
اسٹیج پر پربھاکر آرا پجاری (ضلع صدر، کرناٹک رکشنا ویدیکے)، پربھاکر پجاری (کلاسک بلڈرز، اُڈپی)، شیو آر پجاری (صدر، کرَوے کنداپور تعلقہ)، پون نائک (پولیس افسر، گنگولی)، ڈاکٹر شویتا آچاریہ (شیوموگا)، ساگر (ضلع صدر، امبیڈکر سینا، رام نگر، بنگلورو)، وجیندر کمار (محکمۂ محنت کے انسپکٹر)، کمار نائک (بھٹکل)، سبھاش شیٹی (صحافی، اُڈپی) سمیت متعدد صحافی، سماجی کارکنان اور امبیڈکر سینا کے عہدیداران موجود تھے۔
تقریب کا آغاز وَیشنوی ارون آچاریہ کی دعا سے ہوا۔ استقبالیہ خطاب کرناٹک ورکنگ جرنلسٹس وائس اُڈپی ضلع کے صدر دامودر موگویرا نائکواڑی نے پیش کیا، جبکہ تنظیمی تعارف ستیش کنچوگوڈو (ضلع صدر، امبیڈکر سینا) نے کرایا۔ نظامت اور اظہارِ تشکر کے فرائض سندر گنگولی نے انجام دیے۔
موصولہ رپورٹ : کراولی نیوز نیٹ ورک بھٹکل
