رحمت آباد میں سڑک اور پینے کے پانی کے مسائل پر فوری توجہ کا مطالبہ
رحمت آباد فرینڈز فورم کی ڈپٹی کمشنر سے ملاقات، دو الگ الگ یادداشتیں پیش
کاروار: (کراولی نیوز بیرو) رحمت آباد فرینڈز فورم، بھٹکل کی جانب سے رحمت آباد، ہیبلے علاقے میں سڑک کی خستہ حالی اور پینے کے پانی کی غیر مناسب فراہمی کے مسئلے پر فوری کارروائی کا مطالبہ کرتے ہوئے جمعرات، 8 اکتوبر کو اتر کنڑا ضلع کی ڈپٹی کمشنر محترمہ لکشمی پریا کو دو الگ الگ یادداشتیں پیش کی گئیں۔
پہلی یادداشت میں تنگنگنڈی کراس سے رحمت آباد اور تنگنگنڈی بندرگاہ کی جانب جانے والی محکمہ تعمیراتِ عامہ کی سڑک، جسے جامع آباد سڑک کے نام سے جانا جاتا ہے، کی خستہ حالی کی جانب توجہ مبذول کرائی گئی۔
فورم کی جانب سے بتایا گیا کہ علاقے کے باشندوں نے اس مسئلے کے سلسلے میں ستمبر کے پہلے ہفتے میں ڈپٹی اسپیکر و بھٹکل کے رکن اسمبلی جناب منکال ایس ویدیا، مونسپل کمشنر، تحصیلدار اور متعلقہ محکمہ تعمیراتِ عامہ کے افسران کو بھی یادداشتیں پیش کی تھیں۔ تاہم، کافی وقت گزرنے کے باوجود سڑک کی مرمت اور بحالی کے لیے زمینی سطح پر کوئی مؤثر کام شروع نہیں کیا گیا۔
مقامی باشندوں کے مطابق بارش کے موسم میں مذکورہ سڑک پر شدید پانی جمع ہونے کا مسئلہ پہلے ہی موجود تھا، جبکہ اب سڑک کی خستہ حالی، گڑھوں اور ناہمواری کے باعث گاڑیوں کی آمدورفت کے وقت بڑی مقدار میں گرد و غبار اٹھتا ہے۔ اس سے راہگیروں اور مقامی باشندوں کو شدید دشواری کا سامنا ہے اور صحت کے حوالے سے بھی تشویش پائی جاتی ہے۔
رحمت آباد فرینڈز فورم نے ڈپٹی کمشنر سے مطالبہ کیا کہ سڑک کی فوری مرمت اور بحالی کا کام شروع کرایا جائے، بارش کا پانی جمع ہونے سے روکنے کے لیے مناسب نکاسیٔ آب کا انتظام کیا جائے اور گرد و غبار کے مسئلے پر قابو پانے کے لیے فوری اقدامات کیے جائیں۔
پینے کے پانی کی باقاعدہ فراہمی کا مطالبہ
دوسری یادداشت میں رحمت آباد کے باشندوں کو مناسب اور باقاعدہ پینے کا پانی فراہم کرنے کا مطالبہ کیا گیا۔
یادداشت میں بتایا گیا کہ رحمت آباد کے ایک بڑے حصے میں پانی کی پائپ لائن کا نظام پہلے سے موجود ہے اور متعدد مکانات کو پانی کے انفرادی کنکشن بھی فراہم کیے گئے ہیں۔ اس کے باوجود کئی علاقوں میں پینے کے پانی کی فراہمی ناکافی اور غیر باقاعدہ ہے، جس کی وجہ سے عوام کو مشکلات کا سامنا کرنا پڑ رہا ہے۔
فورم نے ضلعی انتظامیہ سے مطالبہ کیا کہ پانی کے مسئلے کا ترجیحی بنیادوں پر جائزہ لیتے ہوئے ضروری اقدامات کیے جائیں اور رحمت آباد کے تمام باشندوں کو مناسب، صاف اور باقاعدہ پینے کے پانی کی فراہمی یقینی بنائی جائے۔
فورم کے نمائندوں نے کہا کہ سڑک اور پینے کے پانی کے دونوں مسائل براہِ راست عوام کی روزمرہ زندگی سے وابستہ ہیں، اس لیے ان مسائل پر فوری انتظامی توجہ ضروری ہے۔ انہوں نے امید ظاہر کی کہ ڈپٹی کمشنر معاملے میں مداخلت کرتے ہوئے متعلقہ حکام کو ضروری ہدایات جاری کریں گی اور عوام کو زمینی سطح پر واضح اقدامات نظر آئیں گے۔
یادداشت پیش کرنے کے موقع پر رحمت آباد فرینڈز فورم کے مجلسِ عاملہ کے ارکان جریر حسن شَوپا، انضاف قاضی، احمد ایم ایس، عبدالمنان، مولوی ابوبکر صدیق، اکراش منیری اور مولوی سید سنان ایس جے کے علاوہ رحمت آباد کے باشندے ابوبکر بائدہ اور یحییٰ رکن الدین موجود تھے۔
سماجی و سیاسی کمیٹی
رحمت آباد فرینڈز فورم، بھٹکل
