بھٹکل (کراولی نیوز بیرو ):
بروز اتوار، 15 فروری 2026 کو اسلامیہ اینگلو اردو ہائی اسکول بھٹکل کے 1981–82 بیچ کا ایک پُراثر، یادگار اور جذبات سے بھرپور ری یونین پروگرام کوکو’س ریسٹورنٹ، جالی میں منعقد ہوا، جس میں ماضی کی یادیں تازہ ہو گئیں اور اساتذہ و طلبہ کے رشتے کی خوبصورت جھلک نظر آئی۔
اس ری یونین میں بیچ کے تقریباً 30 سابق طلبہ نے شرکت کی، جبکہ دیگر 5 سابق طلبہ اور اُس دور کے چار معزز اساتذۂ کرام نے بطورِ خاص مہمان شرکت فرما کر پروگرام کی رونق کو دوبالا کر دیا۔ تمام شرکاء نے ایک دوسرے سے گرمجوشی سے ملاقات کی اور اپنے تعلیمی دور کی یادوں کو تازہ کیا۔
*یادوں کی خوشبو — اسلامیہ اینگلو اردو ہائی اسکول (1981–82) بیچ کی یادگار ری یونین تقریب*
⬇️⬇️⬇️⬇️⬇️⬇️⬇️
https://youtu.be/8B8fn3fP37g
پروگرام کا باضابطہ آغاز جناب قاضی عبدالباسط صاحب کی پُرسوز تلاوتِ کلامِ پاک سے ہوا، جس سے محفل میں روحانی کیفیت پیدا ہو گئی۔ اس کے بعد جناب سلمان جوباپو صاحب نے تمام مہمانانِ گرامی اور معزز اساتذۂ کرام کا پرتپاک خیرمقدم کیا اور انہیں گلاب کے پھول پیش کر کے عزت و احترام سے نوازا۔
اس موقع پر بزرگ اور محترم استاد جناب آر۔ این۔ گڈیگار صاحب نے اپنے تدریسی دور کی یادوں کو تازہ کرتے ہوئے مرحوم اور موجود ساتھی اساتذۂ کرام کی گرانقدر خدمات کو خراجِ عقیدت پیش کیا۔ اسی طرح پی ٹی ٹیچر جناب ایم۔ نظام صاحب نے بھی اپنے طلبہ اور کھلاڑیوں کو یاد کرتے ہوئے اپنے تجربات اور دلچسپ واقعات حاضرین کے ساتھ شیئر کیے، جس سے محفل میں خوشگوار ماحول قائم ہو گیا۔
سابق لائبریرین جناب قاضی نعیم صاحب نے اظہارِ خیال کرتے ہوئے بتایا کہ ان کا انجمن اسکول سے ایک گہرا، جذباتی اور خاندانی رشتہ رہا ہے۔ ان کے والد، چچا اور خاندان کے دیگر افراد بھی اسی ادارے سے وابستہ رہے۔ انہوں نے بتایا کہ انہیں خلیجی ممالک اور دیگر مقامات سے ملازمت کی کئی پیشکشیں ملیں، مگر انہوں نے انجمن اسکول سے اپنی وابستگی کو ترجیح دی اور 36 برس تک ادارے کی بے لوث خدمت انجام دے کر ریٹائرمنٹ حاصل کی۔
جناب ایس۔ ایم۔ ارشد صاحب نے بھی اپنے اسکولی دور کی یادیں اور دلچسپ تجربات بیان کیے۔ پروگرام کے صدر اور سینئر صحافی جناب آفتاب کولا صاحب نے اپنے تعلیمی دور کے یادگار لمحات کا ذکر کرتے ہوئے اسکول سے متعلق چند سوالات بھی کیے، جن کے درست جوابات دینے والے شرکاء کو انعامات سے نوازا گیا، جس سے محفل میں دلچسپی اور جوش مزید بڑھ گیا۔
تقریب کے دوران تمام معزز اساتذۂ کرام کو محبت، عقیدت اور احترام کے اظہار کے طور پر یادگاری مومنٹوز پیش کیے گئے، جس پر اساتذۂ کرام نے خوشی اور تشکر کا اظہار کیا۔
پروگرام کے اختتام سے قبل کنوینر جناب عبدالباسط اکیری صاحب نے تمام مہمان اساتذہ، شرکاء اور سابق طلبہ کا تہہ دل سے شکریہ ادا کیا۔ انہوں نے اپنے اسکولی دنوں کی یادیں، اساتذہ کے مشہور جملے اور دلچسپ واقعات بیان کیے، جن سے محفل نہایت خوشگوار بن گئی اور شرکاء نے بھرپور لطف اٹھایا۔
بعد ازاں تمام شرکاء کے لیے پُرتکلف ظہرانے کا اہتمام کیا گیا، جس سے سب نے خوب لطف اٹھایا۔ آخر میں جناب ایس۔ ایم۔ ارشد صاحب اور جناب عبدالباسط اکیری صاحب کی جانب سے تمام شرکاء میں گفٹ بیگز تقسیم کیے گئے۔
یہ خوبصورت اور یادگار ری یونین پروگرام باضابطہ طور پر شام 4:00 بجے اختتام پذیر ہوا۔
پروگرام کی کامیابی میں خصوصی تعاون پیش کرنے والوں میں جناب آفتاب کولا، جناب ایس۔ ایم۔ ارشد، جناب حافظ عسکری، جناب عرفان جوباپو اور جناب سلمان جوباپو شامل ہیں۔ اس کے علاوہ جناب شاد دامودی صاحب اور کوکو’س ریسٹورنٹ کے تمام اسٹاف نے بھی بھرپور تعاون اور بہترین خدمات انجام دیں۔
آخر میں عبدالباسط اکیری صاحب نے اپنی جانب سے اور تمام سابق ہم جماعتوں اور بیچ میٹس کی طرف سے، معزز مہمان اساتذہ اور تمام شرکاء کا ایک مرتبہ پھر تہہ دل سے شکریہ ادا کیا۔
رپورٹ : کراولی نیوز نیٹ ورک بھٹکل
