بھٹکل میں 3 ستمبر کو انٹر کالج تاریخی تحقیقی میلہ منعقد ہوگا
بھٹکل: اسٹوڈنٹس اسلامک آرگنائزیشن آف انڈیا (ایس آئی او) بھٹکل شاخ کے زیرِ اہتمام “ماضی کے نقوش – 2026” کے عنوان سے تعلقہ سطح کا انٹر کالج تاریخی تحقیقی میلہ 3 ستمبر کو نیو شمس اسکول، بھٹکل میں منعقد کیا جائے گا۔
اس میلے کی تفصیلات بدھ کے روز شہر کے دعوت سینٹر میں واقع ایس آئی او کے دفتر میں منعقدہ ایک تقریب کے دوران دی گئیں، جہاں ایس آئی او کرناٹک کے ریاستی صدر عادی الحسن نے میلے کا پوسٹر جاری کیا۔
منتظمین کے مطابق “کھوج، تحقیق اور تحفظ” کے شعار کے تحت منعقد ہونے والے اس میلے کا مقصد طلبہ میں تاریخ سے دلچسپی پیدا کرنا، تحقیقی سوچ کو فروغ دینا اور مستند شواہد کی بنیاد پر مطالعے کی حوصلہ افزائی کرنا ہے۔
میلے میں طلبہ کرناٹک اور ساحلی کرناٹک کی تاریخ، تاریخی مقامات، نامور تاریخی شخصیات، ثقافتی ورثے اور علاقائی ترقی سے متعلق اپنی تحقیقات کو تحقیقی مقالات، نمونوں، برقی پیشکشوں، دستاویزی فلموں اور دیگر مؤثر انداز میں پیش کریں گے۔
بہترین تحقیقی پیشکشوں پر 30 ہزار روپے کے نقد انعامات، ٹرافیاں اور اسناد سے نوازا جائے گا۔
تقریب میں ایس آئی او کرناٹک کے ریاستی سیکریٹری جوہر کاشف، ایس آئی او بھٹکل شاخ کے صدر زیان بنگالی سمیت تنظیم کے دیگر عہدیداران اور اراکین بھی موجود تھے۔
رپورٹ : کراولی نیوز نیٹ ورک بھٹکل
